八一0四生活盒子 (Closed)

繼續係觀塘覓食，之前行過一直都好想食。呢刻覺得自己去咗台灣，門口有交換二手書嘅一個角落，入到去，裝修好特別，同香港食店有分別，忍唔住會停底望下，步伐太快，入到嚟，自然就會慢落黎。見到有位就可以坐，點餐就去收銀處直接點，佢有得選擇多飯或者減飯，呢點幾好。有三個lunch set可以揀，我揀咗蔬菜雞肉卷配香草薯仔沙律，羅宋湯。羅宋湯好足料，係濃濃嘅蕃茄，無味精味。飲品揀咗雜莓果菜，淡咗小小，下次我會試咖啡或朱古力，應該會好正。主菜到，沙律好味，薯仔整得夠溶，每啖都好好味，我已經忍唔住先食大半薯仔。雞卷部分睇得出好用心整，有菜夾左落去，雞皮煎過，成個卷睇得出用心製作，食完係飽肚同滿足。跟餐額外加15元可以有一客玫瑰威風蛋糕，好香嘅玫瑰味，有啲似海綿蛋糕嘅質地，但實啲。全店用嘅係回收嘅樽做水樽，食材係用本地農作物，亦有賣本地嘅食材，不妨去逛下支持下。見到唔少自己一個嚟嘅客人，聽下歌，睇下書，可以係鬧市中休息一下，呢度確實做得到。