Angel & Devil (Closed)

係觀塘返工，lunch真係有時係想抖下氣，不過好多時想搵間唔錯嘅餐廳，坦白講真係麻麻，要好嘅點都過百元，所以放工無咩都唔會留係觀塘。呢日嚟到呢棟會所設備嘅大廈，佢有spa，gym咁，不過對於我嚟講，如上述，無咩都唔會留係觀塘。講番餐廳先，天使與魔鬼，餐廳主題當然都有配合到啦，部分係白色系列嘅設計，另外部分係黑紅系列。我地坐係白色個邊卡位，原來係棺材，幾有趣，不過坐得遠咗啲，要pat pat坐近邊先食到飯。有啲主題位置，可以玩同影相（可能可以book場搞party？）呢間唔平，未加一都已經98元，最貴都有158。餐包有幾款揀，都幾好味，幾正。我自己好喜歡佢嘅餐具，成件事加好多分。湯正常，幾好飲（餐湯我無乜要求，唔好凍同怪味就得）我要突破框框，我叫咗印尼炒飯，首先回應「誠意」呢點，我係觀塘食飯咁耐，無一間餐廳會熱碟上，呢間有，係真係暖。雞槌好大個，我地幾個都嘩咗，肉係幾嫩幾滑，不錯！唔好睇印尼炒飯細細磚，都幾多下。佢個飯小小辣，幾香口，仲有雞件，蝦同蛋都ok。甜品係Haagen dazs，完全估唔到，仲唔係有誠意！正！Latte嚟講都係苦，其他同事個杯咖啡都係偏苦，要改善下。