スーパー丼 (駱克道) (Closed)

自己係港島人，出街都係去銅鑼灣、太古。每次行銅鑼灣都會經過呢間Superdon，但見價錢頗高，所以一直冇食到。不過今日慶祝有Grad Job offer，自己同女友膽粗粗入左去。之前門口望入去以為只有壽司吧枱座位，原來後面仲有卡位。餐廳以白色灰色為主調，貫徹日系清新樸素既風格。餐廳有春季限定魚生丼。雖然今次沖住魚生飯而嚟，但呢三款對學生既我有啲貴，唯有遲下先再食。登登登登！我最後揀左火焰三色丼，包括三文魚、吞拿魚同左口魚，刺身輕微炙燒，逼曬啲油脂出嚟，其中以吞拿魚油脂最豐盛。另外三文魚鮮嫩肥美，左口魚比起三文魚同拖羅較簿片，但非常爽口，充滿陣陣甘香。飯嘅醋酸味突出，份量比較少，但味道確實實出色。套餐會送埋麵豉湯，味道非常濃郁。女友叫左玉子生薑豚肉丼，生薑豚肉配上溫泉蛋令口感更豐富，生薑味濃郁，豬肉肥瘦適中。另外叫左一串鹽燒牛舌，$48有四大件。厚切但完全唔韌，口感軟脆帶點爽口。一以為炸豆腐係凍食，所以成粒食，點知一咬果下熱辣辣，豆腐仍然嫩滑，外皮香脆。果然一份錢一份貨，其待下次再嚟。