Marine Seafood Bar & More (Closed)

朋友話觀塘有間新開餐廳食蠔好抵，就約定一齊食好嘢，點知等極佢都未嚟，忽然接到佢電話話要開OT，冇計，已經坐低咗，唯有自己一個人食晚飯喇！餐廳幾好情調，地方闊落，是情侶拍拖吃晚飯的好地方。我係海鮮控，見到有海鮮食通常都抵受唔住， 今晚又失控喇！ 一個人叫咗個海鮮拼盤，加個包， 再加幾隻特價蠔試吓。海鮮拼盤份量都幾大，有整隻龍蝦，鮮蝦、青口、翡翠螺同鮮蜆，海鮮好新鮮，點埋餐廳提供少少辣嘅醬汁，好好味。美國太平洋石蠔 雖然唔算大隻，但 入口幾滑，都好鮮甜，少少海水味，唔太鹹， 每隻只係賣$9， 非常抵食。和牛竹炭漢堡配薯條黑炭包烘得好香脆， 和牛漢堡肉質鮮美、彈牙， 一啖咬落去 ，啲肉汁唧曬出嚟，真係估唔到咁好味，我好耐冇食過咁好食嘅漢堡喇 。薯角香噴噴、脆卜卜，如果拌碟嘅沙律菜可以加少少醋汁，就更加好喇！今晚本來想飲酒，但因為揸咗車，唯有飲杯凍柚子蜜解吓渴，都唔錯喎！