不toast不快 (Closed)

葵廣又多o野食又平，百去不厭。今次流連o係三樓，諗住食少少o野掃下街咁。呢間多士/三文治店，俾佢門口隻香檳色玫瑰熊熊吸引住，跟住睇落佢d 多士都唔係話好貴，$30 幾$40 都有，比起出面d burger 店，單包都$60 幾，combo 埋隨時過百，都可試下。新鮮製造，所以要等5-10 分鐘，之後拎o左去新都會個草地度食。春回大地，o黎個小小一人o既野餐，沐浴於午後o既陽光，特別令人舒暢。西班牙黑牛配香草碎茄醬吐司($48) o既多士有一隻手板咁大，裡面亦好足料，感覺幾抵食。塊包最外層有搽o左蒜蓉烘過，滲出燶燶地o既蒜香。重點o既西班牙牛肉有兩片，薄切圓碌碌，以黑椒調味，睇落有少少似熟成肉，但唔太sure~裡面仲有成隻炒蛋，跟住就係被熱力谷到半溶o既芝士、椰菜絲，再淋上沙律醬同蕃茄醬，食完會很飽肚，讓人很滿足。加$16 就可配到價值$22 o既小食，而且件事好chill，佢d 小食d 名特登整到好搞笑，又「脆」味人生，又花生友，回應番佢像極了愛情o既slogan……試o左個三角關係，原來係三角型o既墨魚餅，外面香脆，裡面釀o左粒粒墨魚，過口癮簡直一流。