龍門冰室 (Closed)

喺牛頭角附近收工，時間尚早，竟然仲趕得切食下午茶，快快手手行入牛頭角道嘅龍門冰室，趕喺下午茶時間完結之前平平哋食飽啲，當埋晚餐。一來早食飯容易啲消化，冇咁容易肥，二來下午茶餐又抵啲，早收工嘅好處其實真係好多。龍門冰室提供嘅，當然唔使止下午茶，有全日早餐、飯餐、麵餐，以至特色小食及意粉類等等。餐牌嘅設計都幾靚，唔似一般茶餐廳感覺，比較時尚。叫咗一客照燒汁雞翼炒烏冬(HKD33)，加杯凍檸茶少冰(加HKD2)。凍飲先上，用咗不銹鋼杯，冰凍效果更加突出。雞翼共有三隻，加少少菜同埋車厘茄，尚算豐富。烏冬夠熱，個汁有好重牛油味，食食吓突然有種罪疚感。份量都算多，男士可能會未飽哂，但我就覺得好足夠。餐具都放在櫃桶，自取即可，紙巾則要問侍應拎。