嘉麗園潮州粉麵餐廳

Open Now

Now Closed

平日經常經過嘉麗園，但從來肚餓時未有記起這一家老店，今天心血來潮，來個簡簡單單的一人晚餐。相信元朗人都應該認識呢間粉面店，位置亦都好方便易搵，元朗大馬路（青山公路）間匯豐後一條街就係喇～門口有好大個招牌同banner，除左賣招牌菜，當然仲有成名作「大胃王」同「豪飲王」兩個挑戰啦！若非街坊可能未必知，嘉麗園每晚收舖後都必定清洗鋪面，所以衛生同店面乾淨程度都無容置疑。嘉麗園主打潮州粉面、牛腩牛雜、同各種工場自製嘅丸類食品，當然仲有潮州菜必備嘅自家辣椒油同醬料。因為是日一人晚餐，所以只有空間食一碗粉。因為選擇實在太多，令人心大心細，久經思量，終於揀左牛雜魚蛋河。碗粉賣相不俗，牛雜整齊排列碗上，牛腩汁同炸蒜蔥香混合起來，特別濃香撲鼻。呷一口濃稠上湯，開始浪漫又懷舊的潮式簡餐。嘉麗園用上幼身水河粉，幼滑、容易入口，而且每條河粉之間滲透著濃濃嘅上湯，令人食指大動，喜歡食河粉的朋友不容錯過！牛雜整體味道香濃入味，而且牛肚亦炆得軟滑，不過牛腸內油脂較多同埋有少少沙，影響整體感覺；魚蛋彈牙爽口，但與牛雜相比則較為失色。整碗河粉份量算不少，食完頓時有撐飽肚嘅感覺，很滿足！