麵尊

Open Now

Now Closed

麵尊今次要介紹喺香港仔一間車仔麵餐廳叫「麵尊」，呢間「麵尊」有兩個入口，正門入口有一級，輪椅人士可以轉左邊入香港仔中心入「麵尊」側門，佢哋側門係無障礙通道，不過要L形入去，真係要考考大家駕駛技術！入到去見到餐廳店舖好乾淨好光猛，座位唔會好逼，一般車仔麵餐廳多數一枱至少有兩位陌生人一齊坐，呢間車仔麵真係坐得好舒服，牆上仲有五個不同國家嘅時鐘，唔知係咪提旅客夠鐘上飛機呢？！1.大尊：豬紅、蘿蔔、咖哩魚蛋、紅腸、豬皮、菜（幼麵）$49+熱奶茶$17（9/10）叫咗一碗大尊，呢個大尊套餐對於有選擇困難症嘅我真係一流，唔使諗又多配料，配料包括有5舊唔腥嘅豬紅、2舊好甜無渣嘅蘿蔔、2粒好彈牙嘅咖哩魚蛋、2舊紅腸、2片索哂牛腩湯汁嘅豬皮同幾塊生菜，麵就揀咗幼麵，飲品就揀咗熱奶茶要加$17，奶茶茶味好出，奶味唔見咗，奶茶整體好一般！2.蘿蔔$10、墨魚丸$12、五香牛腩$12（河粉$10）+豆漿$14（8/10）呢碗就每樣配菜單點，揀咗加$10兩舊好甜無渣嘅蘿蔔、加$12兩粒好粉嘅墨魚丸同加$12六舊有少少韌嘅五香牛腩，麵就揀咗加$10要河粉，河粉份量都幾多，飲品就揀咗豆漿要加$14，豆漿少甜幾好飲！