龍蝦大王火焰醉鵝火鍋 (Closed)

好鍾意打邊爐，最鍾意食牛肉，今次呢個打邊爐套餐，有龍蝦及六至八款海鮮，加埋一每個人三百幾元左右，星期一至四平啲、分時段收費。就算你有幾大食，一個套餐正常人一定食唔晒，如果真係好大食的話，有不停追加其他火鍋配料，一定可以捧住個肚走。先來兩個前菜，麻辣木耳及粉皮，都係辣不過好醒胃。湯底有四款，我食過二款，第一個火焰燒鵝，放少少酒用火燒在燒鵝上，食完燒鵝再加上湯，呢個湯底加＄20每位，我覺得冇咩特別；另一個芫荽皮蛋，相當不俗。龍蝦每位半隻，另加其他海鮮，去過幾次海鮮有: 蠔、蜆、龍躉片、蝦、鮑魚、扇貝等等。打邊爐一定要有牛肉、部位是牛脊頸，好有牛味👍。推介新鮮製的魚皮和響鈴，係真係新鮮製，食落去全部脆囗，跟住再嚟兩款栗子及黑松露芝士餃子、魚滑、蝦滑、冬菇釀魚滑、鬼馬油炸鬼。未清枱面食物已經飽，仲有一籃蔬菜，已經食唔落，去咁多次我都未試過追加食物。 飲品任飲，可以試下芒果可樂沙冰、飯後甜品有雪糕、雪糕不是一杯杯是一球球的，香港製造，有益力多、芝麻、芒果及豆腐味，記住留肚食，好正。😬$300幾元價錢打邊爐有海鮮、有靚牛肉、食物新鮮好味、二個字"好抵食"。