藍屋 (Closed)

喺外面睇見個裝修幾靚咁，望吓個午餐餐牌，原來係食港式西餐。兩個人食，分別點了瑞士汁豬軟骨配飯和蟹籽忌廉龍利柳配薯菜。.首先，第一個餐，瑞士汁豬軟骨配飯，羅宋湯，凍檸茶。賣相唔係差，但係食落去好屋村茶記或者樓下買外賣$20一個嘅飯盒一樣質素… 羅宋湯普通，唔算難飲，但係個蒜蓉包又凍，仲完全唔脆，感覺係揸啲牛油，焗完又攤左好耐嘅包。凍檸茶茶底唔苦，無澀味，可惜檸檬都完全無味，總括係飲緊淨紅茶。.然後，同行朋友叫嘅蟹籽忌廉龍利柳配薯菜，羅宋湯，熱啡。羅宋湯同餐包上邊講咗，唔重覆。最尾個主菜，龍利柳炸粉好厚，唔知食炸皮定食魚。薯菜原來唔係薯條，係薯角。都唔緊要，可惜薯角皮又係唔脆，面頭仲要有層好有光澤嘅油，濕濕地咁，睇見都唔係好想食…熱啡…唔難飲，不過一啲都唔好飲！.成餐飯完全冇心機影相，發現剩係得一張，食咗一半嘅豬軟骨飯。我如果硬要講一個好嘅地方，就係食物夠大份嘅。五十幾六十蚊一個餐，包咁多野。不過講返轉頭，五十幾蚊我去茶餐廳或者大快活食仲好。