CoCo Espresso (Moved) New Location

介紹下一間公司附近嘅黃店飯堂，留意返唔係每間分店都有lunch menu，例如‪相隔幾條街嘅蘇杭街分店‬就無提供(不過果間嘅裝修講究好多)。雖然而家無船搭，信德分店少左好多人，但由於食物同飲品即叫即製，有次等左接近半個鐘先上菜，但真係好有水準，值得等待！.Linguine with King Prawns and Vine Tomatoes:大蝦有四五隻，爽口彈牙無雪味， 扁意粉夠煙韌，好掛汁，醬汁偏杰身，好濃南瓜同番茄味，呢碟份量頗多，女仔未比食得哂。Roasted Spring Chicken with Frittata:燒春雞嘅肉質都幾嫩滑，可惜塊皮有少少淋，個燒汁甜甜地幾match。Frittata即係意式烘蛋，平時嘅材料多數有菠菜，呢度就用左薯仔同芝士，呢個組合無可能唔好食。Flat White/ Cappuccino:跟餐配茶或Flat White，其他款式要加錢。佢地嘅咖啡應該出名到唔駛介紹，我同朋友對咖啡無咩研究，只能講佢地嘅出品啱我地口味，一致認為奶味香醇，而且飲完口腔唔會只充斥苦澀味。