熊貓小雲吞 (愛民廣場)

Open Now

Now Closed

自從大學畢業之後都從來未嚟過何文田，今日同朋友一齊過嚟搵回憶。喺搵回憶之前我哋都要醫下個肚先，見到呢間食川菜嘅好似幾啱我哋，咩都嗌啲嚟試吓。佢個名寫到明係食小雲吞，所以必須要試吓啦。我哋揀咗個雙拼，分別係韭菜同埋鮮蝦雲吞。呢個鮮蝦雲吞都唔錯，係幾彈牙嘅。依個韭菜雲吞就冇想像中嘅韭菜香味，啱晒啲唔鍾意浸韭菜味咁濃嘅朋友。另外我哋仲試咗佢個酸辣粉，佢個酸辣粉酸度好夠，不過可能我哋叫咗小辣就唔係好夠辣。佢佢哋用咗自家製嘅辣菜舖取代咗平時我哋會識到嘅榨菜。而佢啲菜舖都真係幾好食，食完都忍唔住買咗樽返屋企。然後我哋見到佢有個串串鍋，不過佢個串串鍋就一支籤都見唔到，我諗佢係為咗方便我哋食掛，但係就覺得除咗個腐皮之外其他都唔係好入味囉。另外我哋叫咗兩份雞翼，分別係孜然味同埋原味，但係佢好似比錯咗蜜糖芥茉我哋。佢個雞翼都真係幾好食，炸粉唔會太厚，一咬開啲肉都好嫩好juicy。另外我哋叫咗佢個冰粉，但係呢度嘅配料係要自己落，略嫌佢嘅糖漿比較少，如果可以多番少少就好食啲。而家呢度有啲好特別嘅氮氣茶，用呢個方法沖嘅茶啲茶味好出，所以都幾好飲。