Shine (Closed)

Shine係一間人氣好高嘅酒吧餐廳，幾年前食過食物水準都好高，疫情期間就算出街食飯都盡量揀啲座會比較闊落同有質素嘅餐廳，因為限酒令Shine嘅吧枱位封左，但餐廳就仍然有開。特級安格斯漢堡配脆炸薯條($198)漢堡好大份，安格斯牛肉目測有1.5cm厚，除左牛肉，中間仲有煙肉、大啡菇、洋蔥、番茄同生菜，包面仲有兩塊炸洋蔥圈。麵包好鬆軟，口感有啲似muffin，幾好食。牛肉好juicy，加埋個芝士汁幾好食。因為實在太多料，所以基本上都要分開一層層食。薯條份量都多，不過唔夠香脆，扣左少少分。法式寶雲酥焗羊架配薄荷醬($308)羊架肥瘦適中，羊羶味唔重，七成熟切開中間肉色仲粉粉地，肉質嫩滑唔韌，蘸埋薄荷醬食鹹鹹地幾好味。鮮果青檸雪葩($60)青檸雪葩味道夠酸好清新，用鮮果做裝飾賣相好可愛。請把我帶走($80)其實係 Tiramisu，另外仲加左$20要石板街雪糕。Tiramisu咖啡味夠濃，蛋糕口感濕軟，做得出色。總結，作為一間中檔價位嘅餐廳，Shine嘅定價雖然唔算平，但食物絕對有質素，服務亦到位，交足功課。