Metal Steak (Closed)

朋友見到，雜誌頻頻介紹，中環有一間食和牛嘅餐廳，好吸引，話好想食。所以，今日特登去試吓，餐廳雖然喺歌賦街尾，不過佢嘅招牌好搶眼，離遠已望倒，好容易搵。一入去，就有店員即刻同你介紹，佢哋係自助嘅，你想食幾多，師傅就幫你切幾多，比咗錢之後，即刻幫你燒，然後你就可以搵位坐，師傅燒好，店員就會送餐比你，你唔好以為要等好耐，因為個爐好大，猛火又高溫，一陣就攪掂有得食。一坐低，無幾耐，我叫嘅近江牛西冷送咗離，唔等啦，即刻趁新鮮熱辣食一啖先，嘩！好好味，肉質好淋，吾韌又無筋，好嫩好滑，絕對係停唔到口嗰種，唔夠5分鐘，成塊西冷比我食晒，真係有D唔夠喉，好彩加咗 $30變咗做套餐，有飯有湯有沙律，都好抵食。仲有叫咗，西班牙黑毛豬配虎蝦， 店員話5成熟就已經夠，其實聽到都驚驚地，對自己離講，好似生咗D，不過都試吓啦，上枱啦，望落去都幾生，一啖入口，完來5成熟嘅黑毛豬，D肉又香又滑，真係好有肉香，好彩聽咗店員講，如果唔係，真係嘥咗件黑毛豬，而虎蝦又大又彈牙，燒完後仲香D，好好味呀！其實由點餐到食完，成個過程都好快，好高效，價錢雖然貴咗少少，不過真係好好食，不過下次要食牛排，一定會再幫襯。