牛角日本燒肉專門店 (Closed)

平時夜晚食燒肉都唔平，聽講$59就食到午餐，緊係要黎試下啦。旺角分店都幾大，好多位。有午市套餐同商務套餐。燒肉餐有前菜(麻醬凍豆腐)，餐飲同白飯，加$12可以轉任食既牛角飯。商務套餐有前菜(椰菜沙律配麻油)，牛角飯，餐飲同牛角雪糕。 雖然燒肉好吸引，但比個豆腐海鮮鍋吸引左。個石鍋上既時候滾到起緊泡泡，咁凍既日子見到都覺得溫暖 牛角飯其實係飯加左甜醬油，蔥同紫菜。就咁食已經好好味，撈埋豆腐鍋隻蛋，好食到唔想停。 個湯有少少辣，豆腐好滑，有蜆，帶子同蝦，重有泡菜，好足料。全部都唔錯，唯獨係隻蝦好嚡。食哂個鍋再要多碗牛角飯就咁食，正呀！牛角雪糕可以揀綠茶或者雲尼拿。綠茶味都幾重，加木糠布甸d粉同蜜豆味既醬，好食 但可能雲尼拿清d會同sauce同粉夾d。下次試下先!!店員好有禮貌。埋單發現平左好多，原來有優惠，4人同行，3人價錢，送左個餐，本來已經好滿足，突然平左，喜上加喜