沁沁麫 (Closed)

早已經從街坊們聽聞呢間沁沁麵係好好味，但係之前想食時門口大排長龍所以無食到，今日去佢對面間百佳超市買嘢，見到唔洗排隊就入去試吓。入到去見到店舖地方不大，中午午飯時間都只係坐滿一半客人，看來疫情對呢間沁沁麵的確有影響。男店員招呼咗我坐低，就話推介佢哋招牌沁沁飯、又話限量、又話剛剛煲起係最香，見佢咁講就試吓啦⋯⋯好快個沁沁飯就到，聞一聞又真係幾香，飯上面有一片脆脆嘅飯焦，臘腸、潤腸、臘鴨、滑雞各有兩件。試一啖個飯有淡淡香料味，又有臘味與雞味，又真係幾好食，好快就食晒個飯，的確幾滿足。最特別係，我通常食親臘味飯之後都會感到好油膩，但呢個臘味飯剛剛相反，飯粒不油膩之餘，連臘味同雞都唔油，值得寫個食評去讚下佢。呢間沁沁麵一定有下次，下次要試佢其他嘢食先。