Zanzo (Closed)

星期五晚既大坑好熱鬧，揀左Zanzo因為唔使等位。入到去先知原來係食串燒。份量偏細，所以咩都試下，叫左好多。竟然全部都唔差，冇一樣係唔好食。油甘魚刺身好肥美又厚切，有一口油既滿足感 芝麻醬同刺身有點格格不入，但同伴碟就好夾。帶子刺身都鮮甜，但不及油甘魚出色。燒蕃薯，一粒粒既日本蕃薯，好甜，外面少少燶，內裡濕潤，好食。燒羊架，肉質幾好，味道差D，帶少少羶。明太子釀雞翼，好多明太子，但味唔夠濃。燒飯團都唔錯，外面燒得好脆，多返d餡會更好。燒粟米，未食已經聞到好甜粟米味，流哂口水。清酒煮蜆，蜆又肥又鮮甜，但就冇乜清酒味。燒牛舌真係好好食 好香，鹽落得恰到好處，少少咸，更惹味。牛舌極爽口炸雞份量可能係最大。都唔錯，雞肉鮮嫩，味道可口。廣島蠔有兩隻味，味噌同燒汁。兩種都好好食，味噌好特別。蠔好肥好juicy。炒烏冬，有明太子同豚肉，青椒紅椒，炒得幾好，唔覺油膩，好食但未算好特別。唯獨燒茄子普通，冇乜味。整體食物質素一流，賣相䚍又好食 服務好，環境氣氛都好relaxing，重有bar枱，適合傾下計飲杯野。唯一係份量細左D，但咁就可以樣樣都淺嘗。