小富臨 (Closed)

今日帶埋一家大細嚟呢到食中菜，除咗一般嘅點心之外，呢度仲有啲少見嘅特色小菜，例如叫化雞同黑胡椒蝦等等。為左氹啲小朋友開心，就order左隻叫化雞，貪佢有得玩又有得食。職員會推架車仔過嚟，請我地用小錘打爛外層。期間職員會講一啲祝福說話，夠曬好意頭。雞肉好香滑，而且份量十足，六個人先啱啱好食得晒。金屋藏鴿脆卜卜，好重奶香，造型好趣緻，小朋友好鐘意！雀籠拼盤有多款點心，包括鮑魚雞粒穌、奶皇包、榴槤酥、蝦餃、鮑魚燒賣黑松露野苗餃同鮮蝦菜苗餃。點心都幾足料，蝦餃入面有啖啖蝦肉，奶皇包既流心餡味道香濃，食到好滿足。而小朋友們就最鐘意食乳鴿，帶起手套，一人一隻乳鴿，好滋味。蔥香燒腩夠晒火候，燒腩外脆內軟，一啲都唔肥膩。小貝浸菜苗，海鮮幾新鮮，味道偏淡，可以解膩。最後嗌左荷花蒸飯，食到超級飽，為今餐畫上圓滿嘅句號。