川之味麻辣米線 (Closed)

川之味位於太子酒吧街，旺角警署後面，地點幾熱鬧，地鐵站行過嚟一兩分鐘腳程，相當就腳。川之味大大話話食咗好多次了，今次先得閒認真寫下食評。呢到店員唔多，有個姐姐惡惡地講野好鬼大聲，唔好睇佢咁惡，但係其實佢都幾好人，記得幾年前岩岩畢業出來做野個樣仲似學生哥，佢都會送杯豆漿比我飲，當然而家老咗就無呢支歌仔唱啦哈哈。可能地理位置靚，做咗好多年口碑都唔錯，所以人流長期好勁，由朝到晚都係好多人，不過而家喺附近做野，有時做到好夜落嚟食(10點幾/11點幾)，呢個時間先叫做少人啲，否則都要排隊等下先入到去。呢到米線可以話係辣到出汁，但係亦都非常之惹味，佢既辣係由1小辣開始上，可以嗌到10小辣，之後有中辣、大辣。1小辣係最弱，10小辣係最勁，我通常食到去4小辣已經盡咗，因為個湯底真係好鬼辣架，你地如果食得辣既可以挑戰下更高級，我都見過有人食中辣/大辣，心諗佢地真係好鬼食得辣。我最鍾意食呢到既豬軟骨，墨魚咀同埋香茜餃，通常嗌兩個餸再加杯凍檸茶落樓，埋單五十蚊有找。呢到仲有唔同小食，包括有雞翼、煎餃等等，不過今次一條友去無食到，所以就無影到相。