澳門茶餐廳 (Closed)

返工的日子無帶飯，要外出午膳的話最緊要係快，所以十居其九唔係飯盒就係茶餐廳。想有齊快、靚、正，一般寫字樓區多數可以畀多十零蚊有啲名牌茶餐廳選擇。尖沙嘴樂道嘅澳門茶餐廳就標榜澳門一條街。不過除咗門口見到葡撻同啲澳門街名磁磚之外我唔係好感染到“澳門”的氣氛，老實講餐廳入面耳聞“苦帽丸”，眼見櫃面有茅台同要險避轆腳旅行喼嘅實情，我反而覺得自己置身羅湖關閘多啲。將我遣返香港係是日精選午餐車厘茄牛柳粒焗飯。有時俾多一個幾十真係有機會食返無梳打粉味同仲有牛肉味嘅牛肉。午市食到咁嘅水準焗牛飯都真Okay 嘅。不過今日杯央走喲茶味俾咖啡味搶曬真係扣分，總之就係失去港澳特色啦。