一糖 (屏山)

Open Now

Now Closed

一糖位於空曠地方嘅平房小屋之中，個環境令我諗起日本嘅沖繩。一場嚟到就試咗幾樣嘢，先嚟嘅係紫黃特飲，杯底放咗柚子蜜，然後就倒啲梳打水，再倒埋蝶豆花茶，梳打水即刻被染成紫藍色。之後再按個人喜好加入適量嘅檸檬汁，睇住佢哋起咗化學作用，慢慢咁分咗紫藍、紫紅同橙黃三層漸變色，我哋都覺得幾靚。鮮芒果腸粉，碗入面放滿濃稠嘅芒果汁，同埋用咗士多啤梨點綴。下面就放咗幾條芒果腸粉，白色嘅腸粉皮估計係用椰漿同蒟蒻粉之類整嘅，咬落有啲煙韌又有啲爽口，中間捲住厚切嘅鮮芒果肉清甜唔酸。睇落平凡，但係味道就唔錯。梳乎厘紫薯，上層係用蛋白打發嘅焗梳乎厘，食之前可以淋跟埋嘅朱古力醬，口感軟綿綿咁。梳乎厘之下係大量嚟自日本沖繩嘅紫薯肉，有少少紫藍色咁，食落軟身粉嫩，甜味唔重，感覺都幾輕盈。由鐵路站行多幾步就到，位置比想像中方便，就算唔揸車都可以輕鬆到達。