南記粉麵 (Closed)

有一日在office見到有個同事食緊麵，好似好正咁，問佢掂唔掂同埋係邊到買，答案係正！在南記買。既然咁講得，今日有機會就同朋友去會一會佢。Lunch time，我第一時間衝去，朋友住附近，所以已經到埗。十二點左右已經好多人，好彩有張二人檯。一個人坐低霸位，另一人去排隊買野食，我揀了四寶紫菜麵加杯凍檸茶，朋友就好似係要雙丸河。我個麵要成$26，加埋飲品要$32，食麵來講都算幾貴，不過中肯ｄ講句，個麵確實係幾大碗。四寶其實即係魚旦、牛丸、八爪魚丸和春卷，魚旦比起謝記個ｄ真係爭小小，牛丸和八爪魚丸一般，就連最有名既春卷都冇咩驚喜。你話佢好差其實佢又唔係，不過就冇謂山長水遠來食。