Achacha Food & Beverage Boutique (Closed)

原來Crepes法式煎薄餅係咁好味，前幾日放工去九龍灣megabox行街，響L5樓層中庭位置旁邊既一間“Achacha food and beverage”， 佢哋主打係食法式煎薄餅，真係一試難忘。餐廳有set dinner同散叫，我哋點咗一個套餐加單點crepes， 頭盤有四款選擇 有沙律、餐湯、意式雲吞配芝士同埋薄切煙三文魚， 每個 set dinner 可點兩個前菜，另加一個加多$15。首先店員會送上法式麵包，烤過嘅法式麵包加埋牛油，外脆內軟，配合埋餐湯一流。 而餐湯係忌廉南瓜湯， 南瓜湯充滿南瓜嘅甜味，味道非常濃郁，忌廉夠creamy，飲完都忍唔住要再加多個湯。另一個前菜係意大利雲吞配芝士， 正方形薄薄嘅雲吞配芝士味道非常夾，作為前菜非常好食。主菜點左油封鴨腿配法式薄餅，大大隻鴨腿封乾配果醬，味道非常好，法式薄餅非常香脆好味，第一次食，簡直食過返尋味，另外伴碟仲有紫薯蓉，亦都係非常出色。另外單點左Crepes Achacha，薄切煙三文魚做餡，加埋其他配料，夾喺法式薄餅中間，變得外面脆，裏面有煙三文魚香味。餐飲係自家製水果茶，水果茶唔太甜，充滿不同種類既果肉，清甜好味。