芝士蛋糕專門店 (Moved) New Location

話說本人好鍾意食芝士蛋糕，但要搵到好味而又唔太貴嘅芝士蛋糕唔係咁容易😔但係，最近我發現咗新大陸！🤩🤩🤩星期六去同事屯門屋企玩，晏晝喺雅都GoGo Mall食嘢，臨走嗰陣見到有間新開嘅芝士蛋糕專門店，個名又幾特別喎，叫YuMo Cheese，好日式嘅感覺，望落啲蛋糕都幾吸引，就買幾件上去晏啲做下午茶😎😎😎我揀咗朱古力芝士蛋糕，其他人分別揀咗原味烤芝士蛋糕、北海道雙層芝士蛋糕同埋草莓抹茶芝士蛋糕，1人1款咁可以試唔同味道🥳🥳🥳下午茶時間終於來臨，一打開，每件蛋糕都獨立用個扇形紙盒裝住，方便拎起嚟食，抵讚！而每件蛋糕都比連鎖店嗰啲厚身，抵食！至於味道方面，朱古力芝士蛋糕：朱古力香濃又唔太甜，十分滑溜，好好食！原味烤芝士蛋糕：實的的，綿滑中滲出好清新嘅檸檬味，食多幾件都唔驚漏！北海道雙層芝士蛋糕：口感比較鬆軟，芝士味非常突出，只係略嫌融得比較快，建議喺雪櫃拎出嚟之後要快啲食🙈🙈草莓抹茶芝士蛋糕：賣相紅紅綠綠好靚，中間層抹茶奶凍好香好滑，少少苦，茶味香濃，加埋啲新鮮草莓，好夾！今次一次過試足4款高質芝士蛋糕真係好難得好滿足，下次要再試埋其他！😋😋😋