Todai (Closed)

已經三年冇嚟過，所以都好期待。我今次嘅目標係魚生同蟹腳，所以一坐低我就攞咗唔少，可借d蟹腳太咸，而且多水，d殼林嘅，d肉亦唔新鮮，用工具都推唔到出嚟，好失望。至於魚生，竟然冇我至愛嘅北寄貝，大扣分，不過d魚生都幾好食，而且不斷供應，要提一提係d酸薑好好食，我哋食咗唔少。食食吓開始有人排隊，之唔係龍蝦仔囉，我又去排吓，攞到返嚟都幾香，熱辣辣，可惜太細隻，食完都唔多覺，而且亦冇意慾排隊再攞。不過龍蝦仔隔離d奶油焗蝦就好好食，雖然每次只可以攞一隻，但係唔駛排隊，我食完又食，正！跟住我試咗d韓式小食，有泡菜同粉絲。泡菜得咸味冇辣味，差！粉絲又硬又冇味，勁差！最後食甜品。梳乎厘好香好好食，水準保持。雪糕預先已經分好一杯一球，好衞生，可惜味道選擇比較少。檸檬芝士餅，絕對值得推介，一口一件，又好味又唔漏，係我嘅全場至愛。總括嚟講有d失望，好多推介食物都唔係好得，而且質素亦比以前差咗。