鋿晶館

Open Now

Now Closed

今日陪老公係上水教波，教完波之後就喺附近覓食，老公係中餐愛好人士，但係又唔想去酒樓食飯，於是決定再戰「鋿晶館」，去食自家製品牌嘅中餐！今次我哋叫咗苦瓜炆䱽魚，苦瓜炆得好腍，唔會係死苦嘅味道，䱽魚煎完先再加芡汁去炆，所以入味得黎又唔會爛晒，甚至仲食到煙煙韌韌嘅魚邊邊位置！跟住叫左咕嚕燴蝦球，啲蝦球真係用一隻隻蝦去炸，無雪藏嘅味道！加上酸酸甜甜嘅醬汁，無得頂。配菜有青椒、菠蘿等等，中和一下成碟餸嘅油膩感。再叫咗個炸魚柳菠蘿包，魚柳炸得好香脆，加上生菜、蕃茄、青瓜，唔錯。特別在於個菠蘿包，令到成個魚柳包生色不少。侍應介紹我地食佢地好受歡迎嘅日式鰻魚飯，啲飯煮得粒粒分明，鰻魚汁好惹味，上面嗰隻蛋又煎得啱啱好，半熟流心咁，熱辣辣好好味，完全明白點解佢咁受歡迎！！最後叫咗兩杯嘢飲，凍冰冰，正！！不得不再提一下！！！大廚曾經係日本東京富麗華做左好多年，係煮野食比高管達人同明星食架，返左黎香港之都係好多間米芝蓮酒店同大型連鎖酒樓集團做過主管，經驗豐富，所以無論煮西餐中餐日式都好好食架！