陳勤記鹵鵝飯店 (Closed)

其實我好鍾意食潮州打冷，不過，A姐成日都話打冷好麻甩，又要坐街邊，又要隊啤酒，佢話佢係淑女，有形象喎。其實，嘆住啤酒，同班friend吹吓水，真係男人的浪漫。但講真，邊個話打冷就一定係大排檔？嚟到上環陳勤記鹵鵝飯店，有米芝蓮嘅推介，坐得夠舒服，連A姐都好鍾意。鹵水鵝1/4上莊唔知你哋鍾意上莊定下莊呢？我就鍾意夠入味又滑嘅下莊脾位，但A姐就鍾意啖啖肉嘅上莊胸位，所以我都係就佢食下莊啦。滷水鵝肉每塊都索晒滷水汁，每片嘅厚薄適中，皮香肉嫩，而且佢唔會好肥膩，啱晒A姐。而滷水鵝肉之下仲有滷水豆腐，好好味。韭菜鵝紅碗鵝紅嫩滑， 絕無腥味， 充滿滷水香。菜脯肉碎煎蛋菜脯脆卜卜，令到呢個煎蛋食落更有口感。潮州蠔仔泡粥一人份量都唔少，而且粒粒蠔仔都脹卜卜，好飽滿！仲有唔少方魚調味，加多少少胡椒粉就更惹味。