多寶樂茶餐廳

Open Now

Now Closed

星期六下晝喺上環收工想去海安食個tea，可惜嚟遲一部四點半收咗工。於是求其搵間嘢食完返歸。見到呢間多寶樂細細間幾街坊，入去試下，見到餐牌真喺嚇一跳，港島區竟然仲有咁親民價錢既老茶。原本想食茶餐，但見常餐都咁抵，就食個呢個啦。沙牛香腸麵配雙蛋方包，餐飲要熱奶茶。沙牛無味好麻麻，但呢個價錢竟然用出前一丁，值得加分，雖然我唔覺出前一丁有幾巴閉，但須知有啲茶餐廳夠膽死要加五蚊先用丁麵，呢間算落本喇。香腸應該係廚師腸，算係港人最熟悉既香腸吧。煎蛋係太陽蛋，稍生，唔食生雞蛋記得出聲要熟啲，不過我就鐘意。方包夠牛油，可惜係凍冰冰，好似啱啱雪櫃拎出嚟咁。最後係凍奶茶，算唔錯，有茶味，最開心係叫少甜，真喺比少甜我，無當耳邊風。值得一提，呢間老茶由下晝二至八有特價炒粉麵飯，只收30，仲連飲品，呢啲價真喺十年前既集體回憶。呢啲街坊餐廳真喺買少見少，希望佢可以繼續經營，服務街坊。