茶A (Closed)

同朋友做完嘢響粉嶺搵嘢食，其中一個帶咗我哋嚟到茶A食下午茶，位置響商場入邊鄰近地鐵站都算方便嘅，起碼落雨都可以直接地鐵站行過嚟，裝修都簡潔舒服，唔知係咪同隔離餐廳同一個老闆，如果冇講到我以為去咗隔離台式餐廳一樣，只係唔同入口，不過整體來講都係乾淨舒服嘅感覺。我就叫咗個茶A招牌豬潤麵常餐，跟埋嫩滑炒蛋同埋牛油多士，另外加咗杯紅豆冰。主要係因為好耐冇去過深水埗食豬潤麵，所以順便開到試吓。嚟到嘅時候份量係幾好嘅，豬潤就有啲過熟，湯係有嗰種豬潤湯嘅味道，不過同一時間就鹹咗啲，可以食豬潤可以食麵，但係唔可以飲湯。炒蛋都算滑嘅，多士平平穩穩冇乜特別但係可以。紅豆冰覺得真係幾夠奶幾香，紅豆係完全一粒粒嗰種。其中一個朋友叫咗份脆炸薯條配黑松露沙律醬，薯條出嚟夠新鮮夠香口，黑松露沙律醬都食到黑松露嘅味，不過沙律醬偏少。另外一個朋友叫咗鹹牛肉炒蛋多士，鹹牛肉炒蛋出到嚟比較厚身，所以食落去口感比較好，多士就冇乜特別，整體來講主要係個擺設感覺好睇。下次嚟可以試吓第二啲嘢食。