爭鮮迴轉壽司 (Closed)

今日同老公放低三隻妖怪打算到荃灣行一陣，話哂最近51黃金週好多地方都做梗減價，行行下肚又餓，但天氣有少少熱就諗起去食個壽司，都出左黎大出血就食返平少少嘅壽司等自己冇咁肉痛。唔知係咪大家都因為長週末去哂旅行定係因為個個去哂掃貨，平時成日咩時段都需要排下隊嘅爭鮮今日竟然唔洗排。呢度我覺得最意外嘅係有海膽壽司，明明都只係8蚊一碟點解都會有海膽呢d比較高嘅野呢？所以我明白佢唔會係咩靚海膽，但食落其實都唔係話太差，起碼唔會有陣怪味又或者係腥味，我明白海膽較貴所以片青瓜佔嘅比例會多d。浦燒立魚：開頭老公以為係鰻魚但食落又唔似 不過可能因為浦燒汁平時係配開鰻魚，所以食起上黎就覺得怪怪地咁，魚嘅肉質較鞋，冇鰻魚咁多油脂。油甘魚：大大塊油甘魚，雖然一碟得一件但因為塊刺身好大所以感覺好抵，不過好大陣雪味，質地亦唔知點解變成一絲絲咁。之後我搵到碟真正鰻魚，果然油脂多d,但反而因爲佢冇任何汁去配撘，就變左好腥。希靈魚：其實我老公好中意食，雖然佢係酸酸地，但有時食都會覺得幾好，佢嘅魚春位置卜卜聲好正。三文魚刺身：8蚊3片都唔錯，幾肥美，係切得唔太好，三塊痴埋一齊。呢度係平食，間唔中係月尾黎過下壽司癮都唔錯。