夏麵館 (始創中心)

Open Now

Now Closed

前幾日行過夏麵館睇到有蟹粉宴，本來想上網訂，誰知道個活動已經完結，但係心中還念念不忘想食蟹粉。今日又行過始創中心，諗住食碗蟹粉麵過吓癮都好。下午茶餐到四點完結，我哋坐低時已經係三點，但係個餐廳幾乎係滿座。下午茶餐選擇中有烏金蟹粉拌麵，咁就梗係點佢啦！我哋兩個人，所以仲嗌咗一個鮮肉小籠包同埋一個紅油炒手，飲品就要咗酸梅湯。雖然係下午茶餐，但係碗烏金蟹粉拌麵一啲都冇欺場，份量充足而且勁好食。叫得做烏金一定係黑色，啲麵應該係用墨魚汁製成的，拌上金黃色的蟹粉，視覺上形成強烈的對比。墨魚汁面非常有咬口，撈埋啲蟹粉食滋味一流，鍾意食蟹粉的朋友，我強烈推薦呢個餐。紅油抄手同鮮肉小笼包每份有四件，抄手一向係我嘅至愛，尼度嘅抄手 好大粒，調味亦都非常之唔錯，係我鍾意嘅味道。至於個小籠包，湯汁清甜，但係我嫌佢啲皮厚咗啲，所以有少少失分。埋單時問咗句個蟹粉宴係唔係已經完結，結果被告知雖然網上活動巳經冇咗，其實佢哋仲會做到今個月尾，而且walk in都冇問題。咁我就一於喺月尾之前嚟食多一餐喇！