泰滋美 (Closed)

喺附近工作做晏咗又未食飯，見好耐無幫襯呢間泰國小店一於再試吓近期水準仲得唔得？過哂下午茶時段得我一個客叫嘢食，order咗一個炸豬扒冬蔭功金邊粉，好快手七、八分鐘左右就有得食。呢度嘅炸豬扒係分開上亦已經自動碎上不另收費，都幾細心。炸豬扒係帶骨嘅size不算大，薄身嗰隻份量ok，可能比較易熟，係即叫即炸嗰種，調味不錯，如果再炸多陣就更香口！重點嘅冬蔭功湯粉，湯底味道十分濃郁，酸度夠充滿椰香味，金邊粉份量超多，湯又多，仲有大量切成條狀嘅菇，索哂啲湯汁入面亦有蕃茄同芫荽之類，好似仲有啲芽菜，辣度適中，都幾開胃，胃口細啲都未必食得哂碗粉！跟餐叫左杯凍咖啡，味道香濃，應該不是純泰式黑啡又不是港式嗰種，總之味道不錯又大杯。整體是一間幾不錯的小店，裝修無乜不過嘢幾好食，招呼也不錯，有效率，位於內街但又不算吊腳，埋單72，要平相信有其他選擇，不過論質素、味道對得住價錢有凸，同老闆娘傾了幾句佢話可能嚟緊都未必續約再做要試嘅朋友要快啲幫襯喇！