Sixer Burger (Closed)

最近成日都想食burger，終於黎到荃灣搵野食，知呢區多漢堡包店，心大心細都唔知點揀好。最後見呢間位置方便，係正千色店對面，座位又幾舒服就決定食呢間。一睇餐牌就見到好多款burger 揀，本來想叫排第一嘅牛肉漢堡，見到有配煎蛋應該會好好食，但望落啲見到有龍蝦漢堡，就二話不說揀呢個！ 仲可以加埋牛肉，雙倍滿足！！ 叫龍蝦之前特登問左店員係邊度黎嘅龍蝦（怕係大陸啲小龍蝦），話係海地黎架，應該都唔錯！ 黎到果然冇失望，一大條龍蝦尾，再加埋成吋厚嘅手打牛肉，好大個，好在同朋友share, 如果唔係都唔知點放入口好～牛肉一啲都唔乾，雖然係全熟，但都好有肉汁，牛肉味都好濃，好味！ 不過原來龍蝦牛肉漢堡係冇煎蛋😭唯有下次再食至於龍蝦肉就好厚，都幾爽，亦食到鮮味，份量都多，唔似出面食啲龍蝦包全部碎上，呢度就正好多～跟手再叫左個炸雞薯條，即叫即炸，雞肉真係超滑，一撕開雞件就狂流肉汁，好juicy! 呢個下次黎一定要再食，連唔食雞皮嘅朋友都忍唔住食左，真係抗拒唔到！ 不過薯條就炸得唔夠脆，可能係比較大條，如果轉用幼身啲嘅薯條，或者係薯角就最好。最後叫多個周打蜆湯，都幾好味，蜆肉都幾多，唔會太滯。