FAB Kitchen (Closed)

朋友介紹呢間餐廳，我同老婆兩個放假就過黎幫襯下，果然好得！唔係朋友介紹都唔識搵到黎呢度。Lunch set 價位多數百幾蚊左右，有沙律或湯、餐包、主食、甜品同飲品。西餐廳正路價錢，但走法式路線就超值！餐包仲熱烘鬆軟！煙鴨胸阿根廷青醬沙律，配上脆片，口味清新獨特。而另一款有機牛油南瓜栗子沙律，好香滑，沙律醋同新鮮軟滑嘅南瓜非常匹配，咀嚼嘅時候間中食到栗子肉，口感層次又豐富左。主菜意式牛肝菌 半圓雲吞配忌廉汁，非常香滑嘅忌廉汁令雲吞sir一聲就滑入口中，忌廉味之後係好香牛肝菌味，呢個菜貫切意式雲吞比較結實，外型優雅。呢個煎盲鰽魚配大蒜薯仔烤餅煎得非常好味，只係用少少鹽等調味，皮香肉鮮味；烤餅非常有心思，雖則只係薯仔烤餅，但大蒜同調味烤起黎，烤餅配角都變主角。咁法式嘅lunch，餐飲當然要叫西茶啦。薑蜜茶同埋藍莓芝士蛋糕就perfect match。用茶壺奉上，老婆話好似淺嚐一個小小下午茶。