茶木‧台式休閒餐廳 (Closed)

同朋友相約銅鑼灣，見到將近半年無食過嘅茶木，就一時心動入左去攞籌。下午1:45都仲係人頭湧湧，於是等左四個字左右。首先黎嘅係跟餐飲品-熱黑糖冬瓜茶，大杯色濃，但黑糖味道太甜，令冬瓜茶清新嘅味道不夠突出。麻辣豬耳爽口入味，辣油份量適中，配以青瓜消膩，香口開胃。呢碟小食份量足料，手撕雞肉質頗嫩，拌上絕配嘅芝麻醬，令人欲罷不能，但食到最後頗為膩，建議小食改為一碟2-3款，增加新鮮感。紅燒牛肉麵大伏湯底色濃但無牛肉香，油膩而且只有香料味，麵條偏硬不掛湯不入味，而且份量極度少，僅僅兩口就食完。所謂牛肉就只有一片，慳住慳住食得十分可憐。結果食唔飽又要加多個甜品填下肚，甜品擺盤靚，芋圓尚算Q彈，配料亦足，但配料下面係半碗黑糖水，似黑糖冬瓜茶嘅味道，奇怪而過甜，未有清新感，感到失望。