Kuru Kuru自家製手作意粉 (Closed)

我從未食過自家製嘅意粉，行過見到寫住自家製意粉，我心諗究竟同我喺超市買嘅意粉有乜唔同呢，就去食吓先知！呢間餐廳裝修好清新，俾人感覺好休閑，而餐牌入面有好多款意粉，我就揀咗意式肉丸配牛豚肉醬，而我朋友就揀咗溶岩芝士温泉玉子卡邦尼！每款意粉仲可以加$25有埋餐湯、沙律及飲品，飲品我揀咗冰茶。沙律菜都算爽脆新鮮，而家沙律醬一啲都唔吝嗇，好多醬呀，唔錯！今日嘅餐湯就係粟米湯，都算清甜。我朋友嘅溶岩芝士溫泉玉子卡邦尼嚟咗先，滿滿芝士遮蓋住入面啲意粉，我夾起嚟食咗一口，芝士味就無我想像中咁濃，但流心蛋汁加返粉，食落都幾match！我嗰個意式肉丸配牛豚肉醬都嚟埋，買相同餐牌幅相一樣，有四粒肉丸，咬落去啲肉丸唔乾之餘仲要係有肉汁，再配埋鮮茄醬，好好食！自家製意粉形狀扁而粗厚嘅口感，好有咬口！如果我呢碟可以加少少芝士味道會再出色啲 ！要讚下杯冰茶，杯茶唔會好甜，入面仲有兩舊鮮橙，當食完個意粉後，食埋橙，清清口腔味，好滿足呀！其實呢間餐廳入面仲有拉麵食，下次一定要食吓先！