茶餐廳2.0 (Closed)

今日放假約咗兩老食午餐，平時行過見到呢間食店都好多人，而且食物都幾吸引。咁就帶兩老去試吓。我地大約晏就十二點半入座，被安排坐近窗口嘅卡位。先望吓餐牌有咩食先。午餐都幾多選擇。我地叫咗茶膽貴妃雞飯，銀魚仔咸蛋蒸肉餅配白飯同一個鐵板西冷。飲品叫咗熱檸水，Mocha同芒椰派對。三個餐都奉送餐湯。先講肉餅飯，肉餅唔會話全部都係肥肉。銀魚仔數量都幾多。而且咸蛋唔會話得個死咸。配白飯一流。然後就係貴妃雞飯。貴妃雞肉質幼滑。清清地幾好食。到鐵板西冷扒。首先會有配有面包。然後就係大大份牛扒同薯條。西冷肉汁豐富，絕對唔會話將貨就價，而且唔多肥肉，啱晒食肉獸。飲品方面，mocha勁大杯。而且唔會太甜。最意想不到嘅係，竟然有埋拉花。好有心思。至於芒椰派對，家母表示芒果味濃，而且仲好香椰味。最後值得一提係侍應嘅態度，即使餐廳坐滿食客，但佢地不時會照顧食客嘅需要，例如會勁貼心比個碗仔我地裝骨，見我倒晒啲汁落鐵板又會主動問我夠唔夠。而且係我地選擇困難嘅時候仲會同我地介紹餐牌添。食店無論係食物，環境，價錢同埋服務做到一流。好值得大家去幫襯。