Video
Read full review
2014-07-29
669 views
個人都幾鍾意台灣，所以，先後去過台北、宜蘭、台中、高雄、台南、墾丁等地，雖然台北嘅士林夜市未有留下過足跡，不過，晌唔同地方，甚至台北本身，都有去過唔少夜市。小弟就幾鍾意台中嘅六合夜市，夠大又多嘢睇；台北嘅饒河街夜市，亦唔錯，幾好行 ；印象中唔多喜歡高雄嘅瑞豐夜市，逼鬼到暈 。今晚，獲邀嚟到士林棧，品嚐一下「士林夜市」嘅味道，又睇睇能否顯出不甘示弱嘅姿態。雖然小店位處大角咀舊區內，但對我而言都唔難搵，因為一來有朋友住晌港灣豪庭，對依區都有少少認識，二來早前無耐先去過九龍珀麗酒店食飯，都曾經過附近，所以，都有啲印象。內裡實木木枱木櫈，裝修簡潔，光猛企理，牆上又貼有好多雜誌、報紙介紹，以及唔少店內招牌推介，強調無添加味精。至於食物方面，掃一掃啲餐牌，似乎又幾多選擇，廚師推介、客飯套餐、清菜香飯系列、士林皇牌、自選米線及小食……等等，不過，再細心望望，就見喺以幾款招牌菜再作唔同變化。例如其中一款皇牌「日式漢方雞酒食」，晌唔同餐牌中就變成暖暖鍋、配菜飯、配米線、單叫嘅小食。而餐枱紙亦特別印有店中4款名物：士林牛展、雞酒食、梅貴豬扒及皇柚雞扒，實在要會一會佢哋，睇睇味道如何。 士林招牌牛展陽
雖然小店位處大角咀舊區內，但對我而言都唔難搵，因為一來有朋友住晌港灣豪庭，對依區都有少少認識，二來早前無耐先去過九龍珀麗酒店食飯，都曾經過附近，所以，都有啲印象。內裡實木木枱木櫈，裝修簡潔，光猛企理，牆上又貼有好多雜誌、報紙介紹，以及唔少店內招牌推介，強調無添加味精。
至於食物方面，掃一掃啲餐牌，似乎又幾多選擇，廚師推介、客飯套餐、清菜香飯系列、士林皇牌、自選米線及小食……等等，不過，再細心望望，就見喺以幾款招牌菜再作唔同變化。例如其中一款皇牌「日式漢方雞酒食」，晌唔同餐牌中就變成暖暖鍋、配菜飯、配米線、單叫嘅小食。
而餐枱紙亦特別印有店中4款名物：士林牛展、雞酒食、梅貴豬扒及皇柚雞扒，實在要會一會佢哋，睇睇味道如何。士林招牌牛展陽春麵 $42
晌廚師推介餐牌第一個介紹就喺士林招牌牛展米線（$40），可免費轉菜飯或白飯，若轉陽春麵或烏冬需要+$2。牛展並非一片片，而喺切得粗大一條條，加埋陽春麵，大大碗，份量足。牛展確實燜煮得入味又夠腍，據店主講喺改良自台灣牛肉麵，而湯頭亦不俗，雖然唔似日式豬骨湯濃到漿口，但骨香味鮮，濃香不膩，有水準 ；再者，清甜嘅蘿蔔，爽脆嘅生菜，講到依度，個麵應該喺高分之作，不過，啲陽春麵就有啲強差人意，其實，食之前店主都有提及麵嘅問題，但我哋想好嘅又試，唔好嘅又試，的確啲陽春麵一咬腍得交關，無嚼勁 ，大大拉低晒碗麵嘅分數，感覺有啲可惜。
日式漢方雞酒食鍋客飯套餐 $62 日式漢方酒食系列，有雞同肥牛，不過，想食暖暖鍋，就只得漢方雞酒食鍋。依個暖暖鍋客飯套餐，每套包一款主菜（11揀1），一款配菜（6揀1），加一個菜飯或白飯，再送冷熱豆漿，其他凍熱飲另外加錢。
日式漢方雞酒食
一鍋話多唔多，話少唔少，內裡有唔少配菜：木耳絲、枝竹，雞件採用鮮雞，裁得大而厚肉，肉質挺實而香滑；當然，依道菜個藥膳湯底先喺亮點，從餐枱紙嘅介紹，加入咗蔘鬚、黃耆、川芎、淮山等中藥熬煮 ，打開蓋一刻，已聞到酒香及藥香，呷一口真喺有種暖身嘅感覺，當然，都喺留待寒冬之時，先多飲幾碗，可促進血液循環，依家天口熱，小酌啦！
肉燥茄子雖然只喺簡單煮好茄子，再淋上肉燥，但整體感覺不俗。肉燥做得唔差，有咬口，都幾香，而茄子炸得軟身，但估唔到又唔太油。
凍豆漿 雖然跟餐，難得杯凍豆漿都仲有咁大杯，豆味唔算好突出，而且少甜，不過，豆渣多，所以飲落少咗份香滑感，隔渣方面要多做啲功夫。
梅貴豬扒 $25 晌小食一欄，多款精選或皇牌小食，都喺賣$23 / $25，先試其中兩款：梅貴豬扒及皇柚雞扒，幾鍾意個餸名，玩晒食字。豬扒用上價錢較貴嘅上肩肉，即喺梅頭，咪以為我一食就食得出，都喺張餐枱紙有介紹啫。唔單只咁，成日聽到廚房傳嚟揼嘢聲，原喺喺大廚鎚鬆啲豬扒，所以，咬落真喺非常鬆化，而且又炸得甘香，唯一要挑剔喺入口有啲油，可能配菜飯或米線會更理想 。
皇柚雞扒 $25 個雞扒比起個豬扒賣相靚得多，無咁「黑古勒突」好似炸燶咗咁，色澤金黃，加埋少少柚蜜，寧舍閃爧。雞扒無乜特別咩位置或處理，重點反而落在個汁度，據介紹喺用咗台灣南部頂級白柚子加菜蜜煮成，柚蜜清香酸甜，配合嫩滑雞扒肉，感覺幾清新開胃 。
芒果乳酪 $15（跟餐+$9）淡黃色嘅芒果乳酪，芒果味淡，感覺唔太自然，乳酪嘅存在感實在無乜，唯冰凍酸爽，叫人一飲醒神，可能紅、綠茶會好啲。
梅子冬瓜茶 $18（跟餐+$12） 店主話新產品，仍然喺邊試邊改嘅階段，以冬瓜煲腍再壓蓉，又加入雪梅，入口先喺一朕冰涼，感覺天然，又帶點雪梅嘅酸香，令人消暑，而茶中有好多粒粒瓜蓉，口感幾有趣，不過，唔喜歡嘅人相信會覺得怪。
其實，去過咁多夜市，老實講，夜市食嘅嘢可謂大同小異，偶有一啲夜市會有幾檔至出名嘅名物販賣，不過，就真喺唔識點形容依個喺士林嘅味道，嗰個喺饒河街嘅味道。總之，行台灣嘅夜市，就有好多嘢食回「味」！今晚，晌士林棧，都有回味嘅嘢食，再次多謝店方邀請！
Post
