伍佰私廚•海鮮火鍋

Open Now

Now Closed

Item: 伍佰私廚•海鮮火鍋
Rating: 2
Author: or#Tm66420147

4.5

57 Reviews

Taste

Decor

Service

Hygiene

Value

4313

Tsim Sha Tsui

$101-200

Guangdong Hot Pot Seafood Private Kitchen

or#Tm66420147

Level1

Read full review

係IG見到有food blogger介紹，所以決定今年冬至試吓。點知大失所望，無論係食物質素，座位安排定係同餐廳嘅溝通都只能形容為「沒有最差，只有更差」。

知道冬至一定好多人，所以我地早咗三個星期經openrice book咗7點食晚飯。
食飯前3日，餐廳WhatsApp我，要求確認人數日子，同埋要俾$1000訂金+訂好菜式。WhatsApp有電子menu，我地就睇menu訂好晒菜式。
然後，食飯前一日，餐廳突然間通知話冬至因為客人多，所以要食兩輪，6:30-8:30 或 8:30打後。呢個時候已經覺得餐廳安排混亂，咁遲先通知。不過都唔緊要，我地人少少時間容易遷就，揀食早一輪。

我地當日準時到達之後就安排入座。餐廳中間係一個大廳，啱啱好前後放到兩張12人檯，然後零零丁丁係牆邊有一張開咗一半嘅圓形檯，size最多坐兩個人。不過，偏偏係其中一邊窒多咗一個位，仲有個伙計坐咗喺度執menu。我地已經心知不妙，周圍望都唔見有其他細檯，果然真係要坐呢張好似僭建出黎嘅檯。我地即刻要求轉檯，不過員工話今晚全場滿座，冇得換。一張二人檯格硬安排三個人坐，呢個做法都係係茶餐廳就見得多，完全冇諗過係一間私房菜都會有咁嘅安排。又或者，可以提早話俾我地聽，等我地可以選擇接唔接受呢個安排。結果我地表達不滿，員工唯有調動隔離大檯嘅座位安排，等我地可以坐得鬆動D。不過第三個人就全程坐咗喺走廊通道，熱湯呀熱餸呀不斷係後面傳黎傳去，又時不時會俾人撞，真係坐得非常唔舒服。坐低咗之後又遞menu叫我地揀餸，真係問號問號，唔係話冬至要預先訂好晒餸咩？安排咁混亂嘅？

終於都可以食飯。
首先，黑蒜螺頭雞湯（$80/位）。見到有雞腳，瘦肉同黑蒜。味道唔錯，黑蒜味都出色嘅。

黃金蝦球（$216）。全碟有6隻，唔係特別大隻。鹹蛋黃味都夠濃，不過唔夠香。擺盆就麻麻，有D求其。炸粉唔夠香脆，同埋包住埋隻連殼嘅蝦尾，一咬落去成口殼。

啫啫乳鴿煲（$228）。呢個煲真係大失望。啫啫煲一上菜已經完全冇渣渣聲，完全冇鑊氣冇香味。D乳鴿每一件D肉質都唔同，一係超級韌，一係鞋口，一係粉。斬件一開四，但係又斬得唔好，會冇啦啦有一個好尖嘅骨突出黎，要食得小心D。

羊腩煲（$388 >> 結果變左$488，陣間會解釋）。已經算係全晚比較好食嘅。羊腩肉質嫩滑，半肥瘦，唔會騷。味道就好似一般出面食嘅羊腩煲，唔驚艷。不過肉質質素高，可以搭救吓。

蟹黃蟹肉扒豆苗（$418>>$428）。第一，蟹肉係罐頭蟹腳肉嘅質素。第二，蟹黃完全冇香味。第三，豆苗質素麻麻，偏油膩。完全唔值呢個價錢，你唔講我都唔知原來有蟹黃。

本來以為已經唔能夠再差，點知到埋單嘅時候仲誇張。張單黎到，盛惠$1826。其中茶芥每位$20，不過其實得一杯熱水（連茶都冇），花生本身就話送俾我地食嘅。再仔細望張單，哇，明明電子menu話$388嘅羊腩煲，點解變咗$488 ！蟹黃蟹肉扒豆苗$418，點解又變咗$428 ！我地即刻搵伙計問。我地第一個問嘅女伙計態度副氣，話「WhatsApp個menu唔update㗎，總之依家係$488啦」，然後走咗去。menu唔update又放出黎俾客人參考，到埋單先被通知加咗價，真係覺得好離譜。結果我地搵多咗兩個伙計據理力爭先肯改番價錢。

總括黎講，成餐飯就只能形容為不知所謂，搞到今年冬至飯真係難忘至極。故事教訓：以後唔可以再輕易相信網上嘅宣傳。