夢見屋 (Closed)

自稱經理的女人態度極其惡劣，完全沒有’服務’可言，更出口狂言「你唔好俾我喺街度見到你」！事緣我同小朋友已坐低兼食緊，有另一枱客走入我哋隔離張枱。其實我哋兩枱客完全無碰撞，呢枱客亦無出過一句聲並已坐低！但自稱經理女子走埋我張枱，就話我哋好頂住人哋，想拉我哋張枱，當時我女正烏低頭食緊，佢仲好似我女阻住佢叫佢停。我感覺好差，同自稱經理女子講：「枱係你哋自己set，有嘜理由我哋食食吓走埋嚟拉我哋張枱，仲要話係我哋頂住人哋！」佢態度極差地話「我無話過你頂住人哋，我係話張枱頂住人哋」！到埋單時我問另一侍應經理姓名、有無途徑投訴，點知該名自稱經理女子就走埋嚟鬧「你要投訴我丫嘛？投訴囉！我做唔做都得架」「你點做人阿媽？你香港人嚟架？想攪到人無工做？」「你唔好俾我喺街度見到你呀」我問佢係咪恐嚇緊我，佢就話「我係唔想喺街度見到你呀，因為你樣衰呀！」連續鬧幾次相同説話！之後就來回我張枱幾次，不斷舉機拍片，我當時只係坐喺度，我直情問佢係咪有精神病！我覺得事態嚴重，最後要報警要求警方處理兼要佢delete D片！真心地覺得好恐怖！點解一間集團經營嘅餐廳會有咁嘅質素？食餐飯攪到要報警，真係激心到食咩都補唔翻！