雞翼山 (Closed)

今日終於試左係紅磡既雞翼山！縱使風大雨大，都動搖唔到我食雞翼既決心！亦理所當然地有指定既朋友人選… 因為我地2個都係平時同朋友食西餐會一人一份雞翼既雞翼控！！！ 點解落雨天食雞翼山需要決心，因為鋪頭基本上無堂食座位。只有旁邊3、4個人既企位空間，其實亦即係條街，基本上係遮唔到雨。好彩，門口有一個比較大既空間，平時應該唔俾係個個位食因為就係counter隔離，會阻住其他人，但正正因為落雨，都冇乜人，所以就霸左個個位黎食（亦係影相靚位）！ 呢到一共有七款唔同口味既雞翼，全部一樣價錢，先黎睇睇餐牌先。專門只係賣雞翼既店鋪唔多，因為唔容易生存。首先要吸引人試，就要靠特色。呢到每一款雞翼都有佢既特色，有d其他地方唔會食到，有d甚至係你諗都無諗過既整法！真係好想試哂咁多款！但生存在世就係要不停作出選擇，因為資源既限制…😢 所以！今次先試左其中4款，分別係文青風玫瑰雞翼（$38）我係鹹檸七雞翼（$38）濃味三重芝士流雞翼（$38）同埋港式避風塘蒜香雞翼（$38） 先講個雞翼底。雞翼全部係炸雞翼，當然配合唔同口味都會有唔同口感，但普遍黎講食落唔會有厚厚既炸粉，亦唔會有好熱氣既感覺，肉質嫩滑，值得一讚。