西貢越南真味 (Closed)

按個人喜好，烤豬肉撈檬好味過春卷扎肉撈檬，豬肉好juicy，夠惹味，肉量比預期多。至於蝦餅湯檬同墨魚餅撈檬比較，兩隻炸餅都出色，咬落彈牙，有嚼頭，不規則外形充滿手打 feel，即叫即炸，唔使點醬汁都夠晒味，蝦餅相對香啲。呢四款之中，至愛係蝦餅，不過一定要跟撈檬食。撈檬配菜超豐富，紅蘿蔔絲、菜絲、青瓜絲、蔥、花生同蒜片等等，大量入碗，見到咁多菜，即時覺得呢餐好健康，麵底唔會因為多菜而少咗，一碗撈檬夠飽肚。最精彩係佢樽撈檬酸汁，甜酸鹹都調到恰恰好，係暫時食過最難忘的，亦令成碗撈檬的味道更上一層樓。午巿跟餐奶餐用大杯上枱，味道不輸蝕於茶記，有驚喜。