九龍餐室

Open Now

Now Closed

聖誕日又出左黎深水埗度買野，攰攰地入左九龍餐室食晏，本來係因為佢門口嘅新鮮麵包好吸引，諗住叫個菠蘿油㗎，但後尾又轉軚叫飯食。午餐時段剛坐落時仲有好多吉枱，食到中途全場爆要撘枱了，其實張枱都幾窄，中間間開有啲迫，無咩事都係食快啲早啲走啦。叫左好耐都無伙計得閒落單，不如試下行qr code等客人自己落？可以節省人手喎。飯餐有湯送，西湯話係粟米忌廉湯，但睇落同飲落都係粟米蛋花湯，名不乎實…中湯唔記得係咩湯了，記憶中偏鹹少少外都ok嘅。餐飲叫左熱檸水同茶走，杯檸水好苦，茶走就幾好飲。朋友叫嘅梅菜扣肉飯，梅菜太少，扣肉太瘦太乾，健康版嘅扣肉？哈哈，完全無肥膏位喎。自己叫左午餐A係焗夏威夷牛扒腸仔飯，個汁酸酸甜甜幾好味，飯炒底有誠意，腸仔係廚師腸，牛扒就焗燶左好乾好硬，敗筆處…無期望就唔會有失望，一間正正常常嘅茶餐廳，唔難食亦唔會話好食，六十蚊個餐係食呢啲。