Greyhound Café (時代廣場)

Open Now

Now Closed

消費券就過期所以就選擇去呢度食返個泰國菜解下思鄉之愁。雖然我哋今次一行三人，但係我哋都食得好放肆㗎，我哋叫咗炸豬手配糯米飯，蟹肉蝦黃咖喱配印度薄餅，泰式滷水鴨腿河粉，雜菌泰式炒河，甜品方面仲叫咗斑斕千層糕蛋糕添！炸豬手配糯米飯我覺得豬手同埋糯米飯嘅質感有啲太硬，不過勝在豬手嘅味道唔錯，另外配上兩種醬料包括係馬拉盞同埋泰式酸辣醬，食落口酸酸辣辣刺激味蕾。蟹肉蝦黃咖喱配印度薄餅超香濃，咖喱嘅味道同泰國食到嘅都好相似，不過醬汁方面可能因為冇蛋漿所以比較稀，不過配上印度薄餅都不錯吃。泰式滷水鴨腿河粉我自己好鍾意佢嘅滷水醬汁，河粉雖然比較散，但係好滑溜，配上爽脆嘅三芽菜增加層次，滷水鴨腿入口有少少騷，不過好香鴨嘅味道，我個人覺得都值得推介。至於雜菌泰式炒河嘅份量比較細，但係佢用嘅醬汁好地道，有泰國風味，所以我覺得都可以一試。最後當然係佢嘅重點斑斕千層糕蛋糕啦，蛋糕一如既往超好食，斑斕味好香濃但係唔會太滯，千層蛋糕每一層都好好食，而且唔會黐埋一舊，味道亦都唔會太甜，分量大幾個人share啱啱好，大家有興趣可以試吓！