Little Break Coffee & Kitchen (Closed)

同事提議食呢間，當日喺冇訂位嘅情況下12:00踩場。去到目測只有2檯客，我哋需要1:30前交檯先有得入座。當日午餐我就揀咗黑松露野菌帶子意大利飯。用砂鍋上，飯質地一啲都唔似意大利飯，太淋仲食落冇口感，差少少仲以為自己食緊糊仔。黑松露味欠奉，亦唔覺自己食到任何菌類，反而帶子有驚喜。飯面有芝士碎，白汁過濃，成個飯都好咸。同事就叫咁個軟殼蟹大菇漢堡，目測件軟殼蟹真係好大，同事話食落啖啖肉，其他冇特別。另外都有同事叫咗澳洲西冷，反而有驚喜喎！是日午餐都跟餐湯、沙律同飲品。餐湯係橙色，打到有泡泡，不過一啲都唔綿密。以為係南瓜湯，但係飲落又唔似，成檯食飯嘅人都冇一個估到飲緊咩湯。沙律一般，至少都係新鮮蔬菜嚟啩！餐飲嘅齋啡反而唔錯，咖啡味重，而且飲落口感厚醇。當日見到隔離檯食客點咗咸豬手，係成隻中Size香脆型，反而仲吸引。其實呢度食物一般過一般，午餐價錢嚟講，都屬於中上價，服務員啲姐姐又好似愛理不理咁，我哋成6個人去，只放4人餐具俾我哋，問佢哋攞時有感佢哋有一股不滿嘅表情。坐位方面都尚算正常，舖頭有室外位置。