NeNe Chicken (新都會廣場) (Closed)

之前係首爾食過隱蔽炸雞，念念不忘，於是去試香港嘅韓式炸雞店。要食梗係食雙味炸雞，點左白郡主同初雪，明太子蛋卷同芝士炒年糕伴拉麵。蛋卷好快到，話雖迷你但係都好大件，切開蛋卷入面有蛋液流出黎，入面有啲青紅椒，味道唔係特別出眾。炒年糕除左平時見到嘅白色年糕，仲有黃色同紫色，我最初見到紫色以為係紫薯，配有一整粒雞蛋，韓式魚片，拉麵都幾彈牙，醬汁幾好味食到微微辣，對我黎講係碎料，周一腹媽媽平時滴辣不沾都話ok食到。白郡主即係酸忌廉汁，食個陣酸忌廉味唔會好重，初雪意思係芝士粉，芝士粉唔係好多，雞件唔大，但係唔係一口雞，唔會食得好輪盡，外皮都脆，肉汁無韓國食到嘅隱世炸雞咁多，肉質都幼嫩。後記：用餐個陣間唔時就聞到一種酸縮味（under arm嘅氣味似的），我以為係餐廳比較焗令到啲員工出晒汗以引至，不過當我留意到無員工行過都有種酸縮味飄過個陣，我懷疑酸縮味嘅野係向我附近，鼻敏感嘅我認真一索，果然就係向我附近嘅白郡主炸雞傳出黎嘅酸忌廉味，之後有啲內疚感，因為心裡面屈左啲員工。