富記飯店 (Closed)

爸爸建議要响呢度開飯，恭敬不如從命。自己已來過不下三四趟，大致已知點樣叫餸...法式片皮雞已係鐵膽菜式。食落只覺一次比一次差--- 皮不脆，肉不嫩；中間所謂嘅鵝肝醬只屬劣等貨色，不值一提...生炒骨亦係水準以下，端上枱時已經有少少凍咗，可能係煮起咗後响廚房擺得耐咗，食味大減...香酥豆腐實際上有D似酥炸版嘅老少平安--- 以豬肉及蝦米混入豆腐蓉然後酥炸，idea幾特別，可惜實在係太油、太油嘞...杏片芝士丸亦係幾特別--- 大大粒墨魚丸入面放入芝士粒，再舖滿杏仁片然後炸之。夠足料，丸打得頗彈牙，有食爆漿牛丸嘅feel，不俗...鐵板生啫生菜，蝦醬味極濃，可惜煎過咗籠，食到底嗰層有D苦...真正出色依然係佢哋嘅老本行--- 燒味。燒腩仔正式皮脆肉嫩，忍唔住食完一嚿又一嚿...送嘅紅豆沙煲至起沙，蓮子亦夠多，出色....餸菜水準有好有唔好，不過不失，但一定比甚麼迎囍、潮樓出色...