豚本家 (Closed)

吉列厚切豬扒定食（$98）真係好厚切，足足有平時坊間嗰啲嘅一倍厚。吉列炸衣薄薄一層，脆口，無油膩口感；豬扒肉質未算軟嫩，但唔會好嚡，邊位有少少肥膏，爽口彈牙唔油膩；吉列醬汁酸酸甜甜，可作中和作用。要咗加飯及加菜，所以白飯及椰菜各多一碗。前菜牛蒡絲味道幾濃。白飯好有誠意，有紫菜同芝麻。麵豉湯味道正常，但頗多昆布片。茶碗蒸夠滑有蛋味。南蠻炸雞定食（$76）並不是炸雞件，係雞扒，又係勁厚勁大塊。雞扒肉質軟嫩，而且仲有少少肉汁。南蠻醬酸味偏少。呢個定食CP值高。吉列竹筴魚（+$18）加多咗一份小食，竹筴魚比預期中厚，但有少少魚腥味，要加啲檸檬汁癖一癖，試過就算了。總括嚟講，呢間餐廳會再次幫襯，食物質素可以，收費合理，服務員有禮態度好（依家好多餐廳都無），環境尚算寬敞（坐位唔會太逼）。PS：自己 scan QR code 落單。午市無加一服務費。