麗都讌客 (Closed)

其實一直都想向大家推介呢間茶樓。不過，係攞位個陣，如果大家唔趕時間的話，不妨指定等二樓既位，因為一樓同二樓既服務態度簡直有天淵之別，係二樓你可以享受賓至如歸感覺，可惜一樓既一班「經驗老到」職員，你會覺得自己係一個隱形人，因為無論你點舉手遞點心紙，班人一樣係以高速絕塵而去，不帶走半點雲彩。到到你坐好之後，當然係嗌野食時間，筆者極力推介各位試試蘿蔔糕。第二個地方通常都係落好多好多粉，食落去好似食緊chemical compound一樣，但呢度既蘿蔔糕，入面真係有一條一條既蘿蔔絲，食落蘿蔔味極濃，唔係一般既味精味。星洲炒米亦係我另一個推介，一般食肆既星洲米大多都係一味整到碟野黃黃黃辣辣辣，但呢度既星洲米，真係好有係馬來西亞食既風味，叉燒、蝦仁、蛋花再配合米粉所合成既鮮味，並唔係一般地方可以做到。腸粉方面，個春風得意腸的確幾得意，由其係當佢地個一期係賣緊蘿蔔絲春卷個陣，只係塊腸粉皮略嫌太厚，但意識良好。今日就同大家介紹住呢三味先，得筆者發掘更多之後再同大家分享！