皇茶 (Closed)

見到呢間飲品開咗大概兩三個月都未飲過，今日食完飯經過我就諗住試吓飲一杯，平時我都係飲珍珠奶茶比較多，但係今次去到見佢有好多唔同嘅海報喺度，介紹好多特色飲品。所以我就問咗佢有啲乜嘢比較特色嘅飲品，佢就推介左呢一個芝士抹茶飲品，有凍飲同埋熱飲，都可以自己揀多冰，小冰，多甜，少甜等等。原來佢呢個飲品有一個特色嘅飲法，就係先唔好用飲管飲，就咁打斜飲一啖，飲落去第一啖嘅感覺就係有啲鹹鹹地嘅芝士，之後就係綠茶香加鮮奶味，有兩種層次感。值得細味。之後就可以攪勻來飲，同一般嘅綠茶鮮奶味一樣，但係有一種鹹芝士味滲出。飲完之後都唔會有好渴感覺，亦都唔會有我最怕嘅綠茶苦味。最緊要係無嗰種用綠茶粉沖出嚟嘅分層唔均匀。呢到飲嘅係好軟滑，好評！